E-brezel ar pobloù o stourm

Gant dispac’h bras an E-bed, da lavaret eo tarzh an internet, e vleunias ur bouchad kelaouennoù, lec’hiennoù peotramant ajañsoù kelaouiñ o vouetañ Yann internetour àr meur a dachenn. En o zouesk e kaver lod na bledont nemet gant ar pezh a denn d’ar pobloù pe yezhoù minorelaet. Ha lod anezhe n’int ket dister, pell alese….

E Breizh, ouzhpenn d’an ABP (Agence Bretagne Presse) e kavo Yann Vreizhad e walc’h gant 7seizh.info hiviziken. Ar dachenn ar Brezhoneg menegomp ivez ar skipailh Horbed.org. Honnezh a voued he lec’hienn abaoe 2010. Ha zo kaeroc’h e c’heller lenn forzh pennadoù skrivet gant tud yaouank eus lise Diwan ‘ba Karaez ha skolajidi eus skolaj Plijidi.

Bro-Asturies, Aragon, Euskadi, Bro-C’haliza, Bro-Gatalunya, …

Er-maez eus Breizh ez eus ur mor a lec’hiennoù ha kelaouennoù dizalc’h pe dizalc’hoc’h anat. Ha lod anezhe a zo a-live gant ar « mediaoù bras » hep mar ebet. Komzet hon eus dija diàr-benn Arredol.com, an « Diario dichital » en Aragoneg. En Asturieg e c’hell an nen lenn lesnoticies.com, un E-kazetenn arc’hantaet, evit darn, gant proviñs Asturies. E Bro C’haliza ur yoc’h a gazetennoù èl Galizacontrainfo.org peotramant novasgz.com, galizalivre.org, h.a. a ya d’ober ur galloud-enebiñ efedus-efedus. E Bro-Euskadi n’eus ket diouer a E-kazetennoù ivez, èl rezon. Kement ha kemer ur skouer hini Berria.info, lec’hienn ar gazetenn holleuskareg hag an arridennad a « vblogak » lojet ganti. Dav eo gouzout an Euskareg avat. Ar re ne ouiont ket ar yezh a c’hell mont da weladenniñ lejpb.com, lec’hienn kazetenn bemdeziek Bro-Euskadi an hanternoz, enni un dibab eus ar pennadoù embannet bemdez àr baper. Evit a sell ouzh keleier Bro-Gatalunya, diaes eo kavout an disterañ kelaouenn ha n’eo ket embannet e Katalaneg. E gwirionez e Su ar vro n’eus ket pikol tud ha ne ouiont ket ar yezh. E-se, ez eus kement a vediaoù e Katalaneg hag ar re embannet en ur yezh stad, menegomp : segre.com , vilaweb.cat/  (enni pajennoù gouestlet d’ar c’heleier e L’Alguer zoken, da lavaret eo an tiriadig katalanek e Bro-Sardinya !), elpuntavui.cat, h.a. Ur gazetenn divyezhek a zo anezhi memes tra : la-clau.net (evit norzh ar vro dreist-holl, kostez Bro-Frañs). An Okitaneg en do e web-kazetenn a-benn an 31 a viz Meurzh (gwel. Ya n° XXX) : jornalet.com. E Bro-Korsika n’eus ket pikol choaz evit ar furchourion. Mennegomp memestra an hini vrudetañ : apiazzetta.com. Ur meskaj etre fent ha keleier e Korseg penn da benn gant forzh « kemennadennoù » al lennerion da heul. Lec’hienn ar gazetenn Corsica info.club-corsica.com/ a vez bouetaet mat ivez. Hag evit ar re troet àr keleier an emsav broadelour : portail.unita-naziunale.org. Rust he neuz hag « Hard-Core » ar pezh zo a-barzh avat ! Ken « Hard-Core » all, e norzh-Iwerzhon ez eus un teñzor evit ar re zedennet gant keleier ar vro : republican-news.org. Nevesaet n’eus ket pell zo, dav eo paieañ evit lenn ar pennadoù siwazh. E Bro-Skos, ur skipailh a zizalc’hourion en deus savet (e saozneg ha digoust) Scottishtimes.Org, istitlet « mouezh Bro-Skos ». En tu all d’ar mor bras e c’hell an nen lenn lequebecois.org, ar webkazetenn dizalc’hour savet gant Patrick Bourgeois. Ha skrivagnerion brudet o fluenn a skriv enni : Jacques Parizeau (bet ministr kentañ Bro-Kebek!), Claude Jasmin, Pierre Falardeau (daou filmour).

Hervez kont emañ dazont ar c’hazetennoù àr internet hag ar pobloù o stourm o deus boulc’het mat an erv-se dija. Pezh zo, n’eus ket bet kavet un « skouer ekonomikel » bennaket c’hoazh evit seurt doare nevez da gelaouiñ an dud.

2 COMMENTS

  1. Trugarez deoc’h evit ar gemenadenn-mañ. Siwazh n’on ket ganet gant ar Brezhoneg. Ha c’hwi vefe kontant da sikour ac’hanomp da zifaziañ an testennoù brezhonek embannet àr Seizh ?

  2. Demat deoc’h,

    Plijout a ra din lenn ar c’heleier a zegasit. Boued zo enno evit neb a fell dezhañ prederiañ un tammig bihan. Domaj e kavan koulskoude e vefe kement a fazioù brezhonek en ho skridoù pa skrivit en hor yezh. Ma skrivit war word e c’hallit implijout reizhskriver an Drouizig evit lemel kuit ar fazioù reizhskrivañ stankañ. Ma rit gant LibreOffice e c’hallit ouzhpenn implijout difazier yezhadurel LanguageTool bremañ. Setu, berr-ha-berr, un nebeud fazioù notennet ganin er pennad-mañ :

    – En o zouesk e kaver lod o plediñ nemet gant ar pezh a denn d’ar pobloù : ar frazenn-mañ n’eo ket reizh, n’eus ket tu da implijout ar ger nemet evel-se. Ret eo ober gant hepken amañ. Pa dalvez nemet kement ha seulement e rank bezañ implijet en ur frazenn nac’hañ. A-hend-all e talvez kement ha « sauf » ha neuze e komprener ar c’hontrol eus ar pezh a fell d’an den lavaret. Diskoulm : En o zouesk e kaver lod na bledont nemet gant ar pezh a denn d’ar pobloù pe En o zouesk e kaver lod a bled hepken gant ar pezh a denn d’ar pobloù

    – Ha reoù anezhe n’int ket dister : daoust pegen stank e vez lennet ar ger « reoù » bremañ n’eo nemet ur gallekadur euzhus diwar patrom ar galleg « certains, quelques uns », el liester. Re zo dija ul liester e brezhoneg, mont a ra en-dro evel « some » e saozneg. Ne vez ket lavaret « somes people ». Ha neuze ne vez ket ouzhpennet ul liester -où en ur ger zo lies dija. En unander e vez graet gant unan bennak pe gant egile. An diskoulm gwellañ amañ : Ha lod anezhe n’int ket dister pe Ha re zo n’int ket dister

    – Yann Breizhad : Yann Vreizhad, kemmadur en anvioù-gwan goude an anvioù-bihan gourel

    – mennegomp ivez : menegomp, gant un n nemetken, taol-mouezh war ar sillabenn gentañ ha vogalenn gentañ hir en unander, taol-mouezh war an eil sillabenn gant an eil vogalenn hir el liester

    – He a voued he lec’hienn : evit hi a voued he lec’hienn moarvat. E brezhoneg e vo graet gant Honnezh amañ : Honnezh a voued he lec’hienn

    – tud yaouank eus al lise Diwan : tud yaouank eus lise Diwan

    – E-maez eus Breizh : direizh. Diskoulm : E-maez Breizh pe Er-maez eus Breizh

    – gant proviñs an Asturies : gant proviñs Asturies; ger-mell ebet dirak an anvioù broioù nemet pa vezont implijet en o stumm gallek. Diskoulm : Asturies pe an Asturi, Italia pe an Itali, Breizh pe ar Bretagn…

    – Kement a kemer ur skouer : Kement ha kemer ur skouer (a-hend-all e vije ur c’hemmadur goude a)

    – kazetenn pemdeziek : kazetenn bemdeziek

    – E gwirionnez : e gwirionez ; un n nemetken, gant un o hir.

    – e Su ar vro n’eus ket pikol tud ha ne ouiont ket ar yezh, amañ emañ an dalc’h; un tammig drol eo lenn se rak aze emañ an dalc’h a lavarer evit diskouez ez eo kudennek pe fall udb. En degouezh e kavan kentoc’h yac’h gouzout ne chom ket nemeur a dud hep gouzout o yezh e Katalonia ken. Setu aze, ar pezh zo kudennek n’eo ket e ouife an dud o yezh met o defe diaesterioù an estrañjourien da lenn ar c’hatalaneg.

    – memestra : memes tra

    – An Okitaneg he do e web-kazetenn : An Okitaneg en do e web-kazetenn; gourel eo ar yezhoù e brezhoneg

    – an hini brudetañ (evit ur gazeten) : an hini vrudetañ

    – kemenadennoù : kemennadennoù, gant 2 n, e berr, a hir en unander, vogalennoù berr el liester

    – mouez Bro-Skos : mouezh Bro-Skos

    – En tu-all : En tu all

    – n’eo ket bet kavet un « skouer ekonomikel » bennaket. Fazi yezhadur groñs. Stag eo ar furm « eo » ouzh ar resis (an, ar, al) p’eo stag ar furm « ez eus » ouzh an amresis (un, ur, ul). Ret e oa skrivañ : n’eus ket bet kavet un « skouer ekonomikel » bennaket.
    E brezhoneg e lavarer :
    – Lennet em eus Ul levr ha Lennet eo bet Al levr-mañ ganin
    – N’eo ket deuet An den a c’hortozen ha N’eus deuet Den ebet
    – Skrivet eo bet An dra-se ha Skrivet ez eus bet traoù

    Dont a ra brav ar brezhoneg ganeoc’h, gant sikour ur reizhskriver e tlefec’h dont a-benn da lemel kuit buan an nebeud fazioù dievezhded en em gav pa skriver re vuan. Chom a ra deoc’h mestroniañ 4 pe 5 reolenn yezhadur diazez c’hoazh a-benn skrivañ ur brezhoneg difazi. Dalc’hit mat da skrivañ e brezhoneg ha da bleustriñ war yezhadur ar yezh. Aliañ a ran deoc’h lenn hag adlenn levr Mark Kerrain : petit guide du bretonnant. Ur bern kuzulioù talvoudus a gaver el levr-se.

    Kalon deoc’h.

    Herve

Bonjour, laissez ici votre commentaire

Ce site utilise Akismet pour réduire les indésirables. En savoir plus sur comment les données de vos commentaires sont utilisées.