Le galo e le païz de Naonte

1

Sav’ouz ben qé le permië parolië de galo avae a-r’vaïr o le galo de Naonte e qé le permië motië de galo o le païz de Gherande ? Yan pa ! Et en 1820 q’un parolië de galo fût bani pour la pourmiere faï par Paul Eudel: Ete-la a nom “les locutions nantaises”. Biao donmaïje ça n’taet point yun qi avae de pormouvae le galo ben sûr (dou temp-la ça taet putot dou cai pour chinae le paove monde, pa) meins tout-come ça qa fût ben de l’amein-la de la Bertaigne qé fût m’nae la permiere rassereriy de galo (su s’qé je savons ao jou d’anet terjou !).

Le motië-li ét pu fo ene meniere de peyèle, de bigène (Mouzeï), de darin (Bouvron), de obréü (Bouvron), de gobion (Pledelia), de tuao (Jugon) pour ben dire meins. Qhecaoze don ? B’am, ét un siun deude Gherande, François Bureau qi l’ecrivit dens le bout dou 19eme, i n-n’ét contance dedens sèz carnettes qi futes erterouë par Gildas Buron cant q’ete-la taet a m’nae son ençerche su le berton de Gherande. Meins dame dedepés indigne de n’en erterouae ene aotant. Ventié q’i n-n’a dedens un solië pa’la enmèle lèz anije-poussieres meins dam farae core savaïr eyou…

Passë le motië-la ét a-vni èz anés 1830-1850 qé lèz seqenses ont parti a se gari un p’tit endrë note langue, permië o l’ouvraïje qé m’ni un notere deude Bllain [Blaen], Léouis Bizeul qi s’ahuchae sti-la, qi s’enchoui d’un motië dens qhi qé lèz mensions n’taen point si temp hinjouze a-vû yelle dedens li de Paul Eudin. D’la d’ssus, lèz paroliës ne s’donites point l’tour su le païz de Naonte, permië su le païz de la Më [Bro-Vaez]. Depés lèz anéys 20 diq’a la ghére de 40 ét dou païz-li qé s’orini etout la permiere sonjéy dens l’erchomance dou galo. Ene couéy o dèz siuns deude Chatéberiant [Kastell-Briant], Seint-Vinçent-dèz-Jaouâ [Sant-Visant-al-Lannoù] e d’anlhou en Bertaigne menites ben dou drao pour note langue.

Eprés la païsséy-la meins, le drao decréïssi un p’tit. Maogré ela i n-n’oyu core ben dou cai de journalizë dedens lèz gazettes ou lèz lives-de-parouésse core. Enmèle yeûz, permië lèz articls a Eloi Guitteny dedens “Le courrier de Paimboeuf” ecrits qi taen o le parlement dou païz de Ré [Bro-Rez]. N-i a etout les veûs dedens la gazette «Pihern» deude Derva [Derval] etout, ene gazette touélangaïjiere (galo, berton, français) qi jou core anet ….

V’éz ben lû dame, le galo ét depés berouéy une oréy consecante vra consecante a la Leire-de-Bertaigne. Qhi core qi pourae s’erpiqhae su la filomiy bertone dou païz de Naonte don ???

1 COMMENTAIRE

  1. Mét’aviz qe l’pey d’Nantt e tantia en raporr ao aotr departmant d’haott Bertengn, n’i a pa corr tant d’ecoll comm ailhou eyou që l’mondd peuv aprendd l’caoze galo…

    I m’sembl qe n’i a qhoq chouzz un ptit droll o st artiql-la: L’ motie galo d’François Bureau, j’an n e poèn oui mension ! Dan l’cou n’ya le sien a Leon Bureau, qhi è lu qhute dan qhoq soulie itou mes st un motie ëd berzounè ! L’bourr dë Ba il ete lu en bass Bertengn !
    N’i a vantié unn tromp ?!

    Tez artiq en galo son hetan tan qe tan 😉

LAISSER UN COMMENTAIRE

Please enter your comment!
Please enter your name here