Crawling in Sludge : «Kavout a ra dimp e klotañ mat hor yezh poatevinek gant ar muzik Metal !»

0

Ur strollad metal barrek ken eo barrek eo Crawling in Sludge. Power-Metal mod Pantera, ar re-se a gan e Poatevineg (peotramant «Parlanjhe»), yezh Bro-Poatev. Evit Ya o deus asañtet da gontañ hiroc’h diàr-benn istor ar strollad ha diàr-benn o choaz da ganañ e yezh o zadoù.

Ya/ Petra eo Crawling in Sludge ?

Dave Crawling in Sludge (CIS) / Savet eo bet Crawling in Sludge 6 vloaz zo diàr ur strollad all anvet Inside Conflit. Pa oa aet JB d’ar Stadoù Unanet da vont da gelenner, gant Dobey, an tabouliner, ar c’haner Baloo, ur gitarour nevez Tchoutch (o tont eus Dynasty’s Bastards) ha me hor boa divizet sevel Crawling In Sludge. A-fet stil eo difounoc’h muzik Crawling in Sludge e-keñver Inside Conflict, ur choaz e oa evidomp. Evit ober un «troc’h» gant Inside Conflict en ur mod.

Abaoe-se eo arruet Pierro, breur JB, er strollad. Gitarour Dynasty’s Bastards e oa eñ ivez kent. Setu, plijout a ra dimp ar strollad evel m’emañ bremañ gant 5 sonour ennañ.

Ya/ E Poatevineg (ar «Parlanjhe») e kanit-c’hwi, a-gaoz da berak ?

Dave Crawling in Sludge (CIS) / Alato, da gentañ tout e oa ur bourd etrezomp e gwirionez. Saozneg saout e oa gant Baloo, neuzen hor boa lavaret dezhañ e vefe gwelloc’h kanañ e Parlanjhe. Ha feiz, mat a oa bet an taol-esae. Ha dreist-holl hor boa gwelet e oa Baloo muioc’h en e aes gant ar Parlanjhe evit ma oa gant ar Saozneg a-fet kanañ met ivez a-fet skrivañ ar pozioù. Goude e oa aet founus an traoù a-benn ar fin. Mamm Pierrot a gomz Parlanjhe flour hag abaoe daou vloaz ez eus 4 eus ar 5 den a  ya d’ober Crawling in Sludge oc’h heuliañ kentelioù Parlanjhe bep lun da noz.

Ya/ Power-Metal eo ho stil ha koulskoude e klotañ mat gant ar Poatevineg. Ha souezhet e vez an dud pa sonit e Bro-Poatev ?

Dave Crawling in Sludge (CIS) / Kavout a ra dimp e klotañ mat ar yezh gant hor muzik ivez. N’eus ket pikol arvesterion o kompren e vez kanet e Poatevineg ganimp pa vezomp o  seniñ e gwirionez. Disheñvel an traoù pa taolont ur sell ouzh ar CD avat p’eo skrivet tout an traoù e Parlanjhe ennañ. Ha se zo ur choaz ivez ! N’eus nemet anv ar strollad a zo e Saozneg diàr daou abeg : da gentañ n’hor boa ket c’hoant bout kontet èl strollad folk ha dreist-holl n’omp ket daet a-benn da dreiñ mat Crawling in Sludge e Parlanjhe. Un droidigezh ha ne cheñchfe ket an anv «Crawling in Sludge». Bremañ avat, pa soñjer mat, e vez digor skouarn an dud ouzh ar c’han e Poatevineg. Lod a oar ar pozioù dre eñvor zoken ! Justawalc’h p’emaomp gant se : trugarez vras da re eus «Los Herbos Crew» eus Vende evit o sikour !

Ya/ Ha bout zo strolladoù rock peotramant metal all o kanañ e Poatevineg ?

Dave Crawling in Sludge (CIS) / Ne soñj ket din evit gwir. Gouzout a ran ez eus ur strollad Black-Metal «Manzer» (hag o deus sonet e Naoned e miz Gouere. Ar re-se a ginnig ur ganaouenn e Parlanjhe e-barzh pep pladenn -NDYa) e anv o kanañ e Parlanjhe ivez met estregete….

Ya/ Ha c’hwi ‘peus liammoù gant ar strolladoù eus Breizh, Bro-Euskadi peotramant Bro-gKatalunya ?

Dave Crawling in Sludge (CIS) / Pas. Met marse e vo skoulmet darempredoù gante a-benn ar mizioù a za. Setu un dra a blijfe dimp ‘at !

Ya/ Ha liammet oc’h ouzh an emsav sevenadurel poatevinek ?

Dave Crawling in Sludge (CIS) / Ya met a-bell nemetken. Arabat ankounac’haat omp ni ur strollad metal ha n’eus ket pikol yaouankizoù o vont er manifestadegoù peotramant degouezhadennoù savet evit ar Parlanjhe. Ne viras ket ouzhimp da vout bet o seniñ ar bloaz-mañ gant seurt abadenn. 3 c’hanaouenn hor boa sonet an dro-mañ. Kanaouennoù adstummet ganimp mod akoustik anat. Ha un drec’hadenn e oa bet a gav din, ken eo bet goulennet ganimp ober kement all da geñver an dibenn-sizhuniad gouestlet d’ar yezhoù rannvro ar bloaz-mañ. Hag hiroc’h vo ar sonadeg ar wech-mañ sur !

Ya/ Hag un emsav politikel a zo da heul ar «poatevinegezh» ?

Dave Crawling in Sludge (CIS) / Tamm ebet ! Klask a reomp ober gant ar yezh kuit dezhi mont da get ha setu tout.

LAISSER UN COMMENTAIRE

Please enter your comment!
Please enter your name here