21ème séqhance – ESTAC 2 – 4 SRFC – La penèle a l’entame… la pouche dans le bout!

0

arton4144-5ee47Sanb’ti qe le SRFC l’anée li ét pus a son amaen cez les aotes qe cez li! L’aote secant core, les bertons ont zeü gros de penèle ao Roazhon Park contr Lorient. Pour cte mach i sont a s’olandër diq’a Troyes, la darène éqhipe de ligue permiëre. Maen dame je savons bein qe le SRFC a d’amouère de métr ao roule les éqhipes mourichonées. An pus d’ela, si qe le SRFC gangnaet la pouche, o seraet ao pus près dou haot dou renjemant de la sézon li.

Estade de l’Aube – 10 292 de monde – maitr departou : Saïd Ennjimi.

Paralh coume la semène pasée, la enrelhit monvéz pour le SRFC. Su la 7ème minute, Camus n’an musse yun é pé qheuq temp épré ét le Jean qi n’an mét yun de pus o la dode.  Venla dans le permiër cart de temp, le SRFC ét maomenë o deùs buts pour ceus de dvant. Les bertons ont gros de deü maen coume la semène pasée, ét les jieunes qi vont mnë la regoncée. Dija le Fallou Diagne va remét dreit le SRFC su un pénalty é pé le Dembélé qi ne décesse pouint de mét cller depé qheuq machs, va mét les deùs éqhipes a jeü. Un ptit evant le rpos, core un pénalty dou Fallou Diagne, ét li q’ét titrë asteur pour de l’ouvraïje de même. ‘la fét q’evant de s’anrtournër es qhernes, le SRFC a la pouche.

Su la deuzième cartée, les bertons vont mét la patte su la balote d’un bout a l’aote. Si bel é si bein, qe le Grosicki va n’an mét yun de pus. A l’about, le SRFC a la victouère 4 contr 2.

Ren qe de bon qaï ao sair la pour le SRFC : il on zeü la pouche, le Ntep q’ét erveneü, é vla les bertons ahaot o ren qe deùs pouints d’ereur dou touzième. Asteur ét de gangnër cez nous, aléz edsu les coutiaos!

Aléz Rene!

LAISSER UN COMMENTAIRE

Please enter your comment!
Please enter your name here