33ème séqhance de ligue 1 : OGCN 3 – 0 SRFC : L’ecoliër é le pousou!

0

arton4196-f4b3bVenla un mach net consecant! Deùs éqhipes q’ont gros d’enviy de jouër l’anée a vni l’Urope. Le SRFC taet caterième et l’OGCN yeùs cinqième avant qe de jouër cte dimène a véprée. Ceutes la ont yûne coume l’aote deùs jouous qi métt la moute a vnir depé qheuq temps : le Ousmane Dembélé é le Hatem Ben Arfa, le jieune é l’anciun des jouous sitant biaos a vair.

Allianze Arena – 17 000 de monde – Maitr-departou : Clément Turpin

Dreit l’entame Nice maomene les bertons qi son pas cller assë. Gros de bedaines é pas assë edsu les jouous niçoués, le Costil ét li bein a son amen pour hors-envelhë la balote ao dehô. Maen a l’ené de defandr, la tourne vilaen. Le Armand mét abas le Seri qi cheit dans la carée ao gardou de caijes berton é le maitr departou subele un penalti par le fét. Ben Arfa atronpe le gardou berton (1-0, 33ème). Le Ben Harfa n’an mét yun de pus un ptit evan qe de s’anrtournër es qernes (2-0, 41ème).

D’ertour es qernes, les jouous bertons vont se reviër un ptit maen pas assë. Dou coup là, le Ben Arfa baode la balote de bièle sorte pour atronpër core le Costil (3-0, 56ème). Courbis mét dou monde nouviao su la carée de jourie, Pedro Henrique, Baal ou bein core Sio maen les bertons vont yètr d’un bout a l’aote trop bein d’trop maomenë.

Venla un SRFC qi cheit épré ceinc machs de reng! Ben Arfa fut lon le mach a son afère tout pendant qe le Dembélé li taet nozou. L’ecolïer Ben Arfa fut pus grand qe le pousou Dembélé. Rëne ne deit pouint decessë de creire dans l’Urope maen i son cojër d’avair la pouche pour les perchaens machs.

Aléz Rëne!

LAISSER UN COMMENTAIRE

Please enter your comment!
Please enter your name here