UDB, EELV : Dou drao su Naonte

1
7

Core dou drao su Naonte e Saint-Herbllaen dou bord de l’UDB e des Verts éz temps-li. Ventié qé le deplet-la va yete dusse a enterluzae pour le monde qi n’sont point a l’amouérde des afustoriomes de drole de la gaoche (e de la drete !) en Bertègn e anlhou. Meins les veu-la terouont ao qai se defutae tout come.

Un ciun de EELV vra chaen de noçe

Pour contae vif toute l’istouére : Didier Quéraud taet le m’nouz d’EELV-Les Verts a la consortéy municipa de Rezë. Ez daraenes voteriys pour les bassadous, stu-ci se porti, biao qé la circonscription eyou q’il alae avae taet “dounë” permië a l’UDB (l’UDB e EELV ont des convenants de voteriy ben sûr). Didier Quéraud voulae don foulae la pllace a l’UDB. Faot vaïr etout qé Didier Quéraud ét conte l’aéroport tant qé l’UDB Yann Quéméneur ét li portë pour. Deude ela gn’a zû dou jeu dedens EELV, e pés Didier Quéraud taet ergardae naïr ben naïr par la consortéy federa des Verts depés un p’tit de temps deja. Mézë, le v’la qé d’yete depouchae dou parti. Sti-la ne va point dét’lae d’o la politiqe sembe-ti, il ét pour yete a sa potéy éz perchaenes voteriys municipa ou ventié ben q’il ira cante le PS, i n’së point core…

Eune opozouz tout sou

N’imporca, gn’a dou drao assë deja céz les Verts dou païz de Naonte. A Saint-Herbllain ça dèle etout parème, depés qé Jean-François Tallio, le maere-adjoint EELV enchaïrjë de la Qhulture, a bani q’i n’savae pu ghére si qi taet conte l’aeroport ou ben point. I futes eune couéy (Pascale Chiron, la ciune qi meune EELV pour les voteriys su Naonte ; Jean Phillipe Magnen, vice-perzident EELV de la consortéy regiona PDL ; François de Rugy ; bassadouz de Leire-de-Bertègn ; Ronan Dantec, senatouz de Leire-de-Bertègn) a huchae dedens le Ouest-France su le paove bounoume-la. I jurites de lou maen e de lou goule qé “”Urope Ecolojiy Les Verts” montae core  conte l’aeroport” e qé Jean-François Tallio taet ben tout sou a sonjae de méme.

Pari qé gn’a dou jeu éz assemblléys d’EELV astoure en Leire-de-Bertègn !

L’UDB cante les Verts ou ben point ?

E l’UDB don ? B’am ét ad’saïr (mardi) qé EELV- les Verts vont savaïr si q’i vont cante le PS dens bétot toutes les parouésses dou 44 éz perchaenes voteriys ou ben si qi vont l’vae lou roléys a yeûz. L’UDB ét a esperae de qai qé va chouézi les Verts e deude ela i chouéziron yeûz etout : le PS ou ben les Verts. Meins dame raport a qé la politiq ét des tours e des ratours e qé le monde-la ont le d’zir qé de ne point yete deqhussae de lou pllace, par dère l’UDB 44 ét a faere eune pâsséy o le PS pour savaïr si qé gn’arae meyen d’alae su la roléy etout, si qé ça tournae vilaen o les Verts.

E pâmins ça degrigne tant qé pu su Hollande dedens l’UDB 44 (e su les Verts un p’tit), meins dame la pou d’yete deqhussë met le monde-la endurant. “Faot yete dou côtë qé le pllat pend” come dizent le monde de par çèz nous.

Aoterment d’aote su Saint-Herbllain gn’a eune roléy a gaoche o des naçionalisses bertons edssus (Saint-Herblain à Gauche autrement) q’ét pour yete l’véy, meins dame l’UDB ne s’enghimente point de trop en d’dens diq’a la…

Des problèmes de compréhension ? lecuyer.fabien@gmail.com

1 COMMENT

Bonjour, laissez ici votre commentaire

Ce site utilise Akismet pour réduire les indésirables. En savoir plus sur comment les données de vos commentaires sont utilisées.